Organizata Germin do të dorëzojë sot një ankesë në zyrën e Panelit Zgjedhor për Ankesa dhe Parashtresa (PZAP) rreth vendimit të fundit të Komisionit Zgjedhor të Kosovës (KQZ) për Verifikimin e Aplikacioneve për Regjistrim Për Periudhën e Aplikimit për Regjistrim të Votuesve Jashtë Kosovës.
“Ne si organizatë jo-qeveritare, misioni i së cilës është avokimi për të drejtat e diasporës vlerësojmë që ky vendim i fundit është kundër të drejtave elementare kushtetuese të secilit anëtar të diasporës të cilët kanë të drejtë vote në zgjedhjet në Kosovë.
Me këtë rast, ne ju ftojmë juve si media, në orën 14:00 pranë zyrave të PZAP-së (Rr. “Migjeni, Ndërtesa e ish Bankës se Lubljanes dhe OSBE-së) në komunikatën tonë për shtyp në të cilën do të prononcohemi më gjerë rreth kësaj ankese dhe ndaj pyetjeve potenciale që ju mund të keni rreth kësaj ankese”, thuhet në njoftimin e Germin.
Ndryshe dje KQZ në mbledhjen e mbajtur ka marrë vendim për verifikimin e aplikacioneve për regjistrimin e votuesve që janë jashtë Kosovës.
“Nga një e-mail adresë aplikuesi mund të aplikojë për vetën dhe rrethin e ngushtë familjar që kanë të njëjtin mbiemër. Në formularët e aplikimit për regjistrim aplikuesi duhet të shënojë vetëm numri ne tij të telefonit dhe jo të ndonjë familjari. KQZ do të verifikojë procesin e aplikimit për regjistrim duke i kontaktuar të gjithë aplikuesit përmes telefonit, kjo është me rendësi të ceket, nëse aplikuesi nuk lajmërohet në telefon, atëherë aplikacioni i tij do të refuzohet”, tha dje kryetarja e KQZ-së, Valdete Daka. /Telegrafi/