Të martën në orët e hershme të mëngjesit një person është vërejtur pa shenja jete në Çagllavicë, ndërsa sot Policia e Kosovës në raportin 24-orësh bën të ditur se trupi i pajetë është dërguar për obduksion.
Në raportin policor bëhet e ditur se rasti ka ndodhur në ora 07:00.
“Njësitet relevante policore dhe ekipi mjekësor kanë dalë në vendin e ngjarjes ku është konstatuar vdekja e viktimës mashkull kosovar. Me vendim të prokurorit trupi i pajetë i viktimës është dërguar në IML për obduksion”, thuhet në raport.
Lidhur me rastin në koordinim me prokurorin dhe me urdhër të gjyqtarit është bërë bastisja në dy lokacione të ndryshme, ku në shtëpinë e të dyshuarit mashkull kosovar gjatë kontrollit janë gjetur dhe sekuestruar disa dokumente, ndërsa në lokacionin e dytë në shtëpinë e dy të dyshuarve meshkuj kosovarë nuk është gjetur asgjë e dyshimtë që ndërlidhet me rastin.
Policia bën të ditur se dy të dyshuarit janë arrestuar dhe pas intervistimit me vendim të prokurorit janë dërguar në mbajtje, ndërsa i dyshuari i tretë pasi që nuk është hasur në shtëpi gjendet në kërkim policor. /Telegrafi/