Po vazhdon që të thellohet në mënyrë dramatike kriza mes Interit dhe sulmuesit kryesor, Mauro Icardit.
Tashmë ish-kapitenit i është marrë shiriti si lider i ekipit, duke ja dhënë këtë epitet portierit, Samir Handanovic.
Largimi i shiritit të kapitenit siç edhe u paralajmërua nga mediat italiane i ka paraprirë mos grumbullimit të tij me skuadrën për ndeshjen e radhës në Europa League ndaj Rapid Vienës.
Në këtë sfidë pritet që të luajë nga minuta e parë sulmuesi në top formë, Lautaro Martinez.
Hendeku mes Mauro Icardit dhe Interit u thellua kur tekniku Luciano Spalletti deklaroi se çështjet e padefinuara mes tij dhe klubit ndikuan në formën e tij dhe në rezultatet e skuadrës.
Ishte më pas Wanda Nara ajo që reagoi në media duke folur për rinovimin dhe përforcimet e klubit, gjë që nuk i ka pëlqyer drejtorit Beppe Marotta i cili reagoi duke ndërmarrë masa.
Se ku do ta ketë fundin kjo sagë, mbetet të shihet, por për momentin Icardi dhe Interi duken shumë, shumë larg njëri tjetrit.
Icardi ka tre muaj që nuk ka shënuar gol për Interin në Serie A dhe distanca gjatë kësaj periudhe me Juventusin ka shkuar deri në 20 pikë. /Telegrafi/
