Një letër e shkruar me dorë nga një vajzë e re bëri që zyrtarët e kujdesit dhe kontrollit të kafshëve në Kaliforni t’i jepnin fëmijës një licencë të miratuar paraprakisht për të mbajtur një kafshë shtëpiake të pazakontë – një njëbrirësh.
Qendra për Kujdesin dhe Kontrollin e Kafshëve të Qarkut të Los Angeles tha në një postim në Instagram se mori një letër të shkruar me dorë në postë nga një vajzë e quajtur Madeline.
Letra thotë: “Të dashur zyrtarë Qarkut LA, do të doja miratimin tuaj nëse mund të kem një njëbrirësh në oborr në rast se mund ta gjej një. Ju lutem më dërgoni përgjigje me një letër”, shkruan UPI, transmeton Telegrafi.
Postimi thoshte se zyrtarët morën “u gëzuan aq shumë” nga letra saqë vendosën të përgjigjen.
“Ne lavdërojmë ndjenjën e Madeline për pronësinë e përgjegjshme të kafshëve shtëpiake për të kërkuar paraprakisht leje për të mbajtur një njëbrirësh në Qarkun e Los Angeles. Si rezultat, ne i dhamë asaj një licencë të miratuar paraprakisht për njëbrirësh”, thuhej në postim.
Zyrtarët gjithashtu i dhanë Madeline një lodër njëbrirësh e cila do ta mbajë licencën përkohësisht, pasi që njëbrirëshet e vërtetë “janë vërtet shumë të rrallë për t’u gjetur”.
Kushtet e renditura në përgjigjen e departamentit për Madeline për licencën përfshinin kërkesën që “njëbrirëshit t’i jepet qasje e rregullt në rrezet e diellit, rrezet e hënës dhe ylberët”. /Telegrafi/