Delegacioni i xhudos kosovare, i udhëhequr nga trajneri Driton Kuka, por edhe xhudistet Majlinda Kelmendi, Nora Gjakova, Distria Krasniqi dhe xhudisti Akil Gjakova, e kanë marrë rrugën drejt Izraelit, ku do të qëndrojnë një javë për t’u përgatitur sa më mirë për Kampionatin Evropian të Xhudos, i cili do të mbahet këtë fundjavë.
Lajmin e ka bërë të ditur për “Zërin” trajneri pejan, i cili e sheh këtë si një mundësi të mirë për garuesit e tij. “Unë dhe Majlinda me Norën do të nisemi nga Kosova, kurse në Izrael do të na bashkëngjiten nga Samsuni i Turqisë, Akili dhe Distria. Do të qëndrojmë një javë në një kamp për t’u përgatitur sa më mirë për Evropian, që mbahet këtë muaj, por edhe për Olimpiadën e Rios. Pra, jam i fokusuar të punoj atje me ekipin olimpik”, është shprehur Kuka për gazetën.
Trajneri i suksesshëm ka njoftuar se në Evropianin e Rusisë do të marrin pjesë të katër garuesit e lartpërmendur, ndërsa shpreson që ndonjëri prej tyre të fitojë medalje. Pa dyshim, fokusi është tek Nora Gjakova. “Nora e ka një mundësi të mirë të shkëlqejë në Evropian dhe ta sigurojë edhe zyrtarisht pjesëmarrjen në Olimpiadë”, ka shtuar Kuka.
Gjithashtu, kjo do të jetë një sprovë e mirë edhe për Majlinda Kelmendin, e cila nuk ka garuar qe një kohë, pasi po mundohet të përgatitet maksimalisht për Olimpiadën e Rios. “Majlinda nuk do të zhvillojë më shumë se dy gara deri në fillim të Olimpiadës, pasi nuk duam të rrezikojmë. Në Evropian edhe ajo do të mundohet të fitojë medalje, por nuk ka kurrfarë ngarkese. Ajo ka fituar gjithçka dhe tash i ka mbetur vetëm medalja olimpike”, përfundoi trajneri pejan. Së fundmi, Distria Krasniqi e vazhdoi serinë e sukseseve të xhudos, duke e fituar medaljen e bronztë në Samsun.