Ministrja e Drejtësisë, Albulena Haxhiu ka njoftuar se nga sot kanë ulur vlerat e kompensimeve për anëtarët e komisionit për noteri, përmbarues privat, administrator falimentues dhe provim të jurisprudencës.
Haxhiu ka pohuar se këto kompensime deri tani kanë qenë të larta, transmeton Telegrafi.
“Kompensimet e deritanishme për anëtarët e komisionit për noteri, përmbarues privat, administrator falimentues dhe provim të jurisprudencës, kanë qenë të larta. Ne sot i kemi ulur ato deri në 50%, në rastin e përzgjedhjes së noterëve edhe më shumë se 50%. Do të marrin fund praktikat e përfitimeve marramendëse përmes komisioneve”, ka theksuar ministrja në një postim në Facebook.
Më poshtë vlerat e ulura të kompensimeve për kryetarët dhe anëtarët e komisioneve për:
Zgjedhjen e Noterëve nga 15 euro në 6 euro;
Provimin e Noterisë nga 10 euro në 6 euro;
Provimin për Përmbarues Privat nga 13 euro në 6 euro
Administrator Falimentues nga 13 euro në 6 euro
Jurisprudencë nga 10 euro në 4 euro. /Telegrafi/
