Tifozët e Juventusit kanë vërejtur se logoja e klubit është duke munguar në listën zyrtare të Ligës së Konferencës, ndërkohë që raportohet se Bianconerët mund të përjashtohen nga garat e UEFA-s për shkak të shkeljes së rregullave financiare.
Zonja e Vjetër mbeti jashtë Ligës së Kampionëve, pasi iu hoqën dhjetë pikë në Serie A duke përfunduar në vend të shtatë në sezonin 2022/2023.
Mirëpo, duket se edhe UEFA pritet të ndërmarrë masa ndaj Bianconerëve duke i përjashtuar së paku për një vit nga garat e veta.
Mungesa e logos në faqen zyrtare të UEFA në listën e klubeve pjesëmarrëse në Ligën e Konferencës i shtoi më shumë këto dyshime.
Derisa ekziston mundësia që të jetë një gabim teknik, duke qenë se më pas është shtuar Juventusi, në rast të përjashtimit, vendin do ta zë Fiorentina. /Telegrafi/
