Reperi i njohur Ledri Vula këtë të diele do të publikojë projektin e tij më të ri muzikor, këngën dhe klipin “U harrum”.
Në një prononcim ekskluziv për Telegrafin, reperi rrëfen për bashkëpunëtorët e kësaj kënge verore.
“Po, kam përfunduar punën për këngën e re, e cila lansohet këtë të diele, në ora 13:00. Kënga është punuar nga Big Bang, tekstin e kam shkruar unë, ndërsa për klipin janë kujdesur Entermedia”, tha Ledri për Telegrafin.
Në vazhdimin e bisedës, Vula tregoi edhe për tematikën që shtjellon kënga, e cila që nga titulli mund të asociojë në të kaluarën. A është kënga e tij e re dedikim?
“Titulli ‘U harrum’ mund të iu ndërlidhet me shumë gjëra, por pasi ta dëgjoni këngën mund ta jepni ju një konkludim nëse mund të gjeni diçka nga jeta reale”, tregoi Ledri.
Klipi i këngës “U harrum” është tejet i veçantë. Produksioni Enternemdia bashkë me reperin kanë marrë rrugën drejt Portugalisë për të xhiruar këtë klip, duke sjell kështu brenda tij lokacione interesante dhe atraktive të bregdetit të Portugalisë.
“Klipi mendoj se do të jetë special për shumë arsye. Vet ideja për ta xhiruar në Portugali më ka shtyrë të bëjë diçka ndryshe. Bashkë me Entermedian, do të sjellim surprizë, e cila besoj se do të pëlqehet”, u shpreh Ledri Vula për Telegrafin.
Ndërkohë Telegrafi ka siguruar edhe disa fotografi ekskluzive nga xhirimet e klipit “U harrum” të kryera në Portugali, nga ku Ledri edhe kësaj radhe nuk do të zhgënjejë me stilin dhe paraqitjen e tij tërheqëse.
Sezona e verës po afron, dhe bashkë me të edhe projektet e artistëve. Për Telegrafin, Ledri tregon se verën do ta ketë një sezonë të ngjeshur me koncerte, nga ku do të mund të ketë mundësinë të jetë sa më pranë fansave.
“Do të vazhdoj të jem i angazhuar me koncerte. Kam shumë data, shumë plane dhe vazhdoj të jem i palodhshëm. Dhe sa i përket këngëve të mija të reja, nuk do të ndalem. Po tentoj të jem ‘in’ me projekte dhe koncerte, nuk e di nëse do lodhem”, përfundoi duke qeshur rrëfimin e tij reperi Ledri Vula. /Telegrafi/
