Episodi i fundit i serialit “Game of Thrones” është transmetuar të dielën mbrëma, ndërsa reagimet dhe kritikat e fansave janë të përziera.
Më shumë se një milion fansa të pakënaqur e kanë nënshkruar një peticion, përmes të cilit kërkohet që të xhirohet përsëri sezoni i tetë, ndërsa Sophie Turner – e cila e ka luajtur rolin e Sansa Stark – thotë se nuk është e befasuar nga reagimet.
Ajo pohon se kërkesat që sezoni i tetë të xhirohet përsëri paraqesin mungesë respekti për ekipin që ka punuar shumë në këtë sezon.
“Njerëzit gjithmonë kanë në kokë idenë se si duan që të përfundojë seriali dhe në rast se nuk u pëlqen, atëherë fillojnë të flasin rreth asaj dhe të kundërvihen”, ka theksuar aktorja.
Turner i ka kritikuar fansat që kërkojnë rixhirimin e sezonit të fundit të “Game of Thrones”, ndërsa peticionin që e ka nisur faqja Change.org, autorët e serialit e konsiderojnë jokompetent.
“Peticionet dhe gjërat e ngjashme paraqesin mosrespekt ndaj ekipit, skenaristëve dhe regjisorëve të filmit, të cilët për më shumë se dhjetë vite kanë punuar pa u lodhur në këtë serial. Sezonin e fundit e kemi xhiruar për 11 muaj. Shumë njerëz kanë punuar pa u lodhur, ndërsa dikujt kjo i duket e parëndësishme, sepse nuk ka ndodhur fundi ashtu siç kanë pritur dhe kanë dëshiruar. Është mungesë respekti”, ka theksuar Sophie. /Telegrafi/