Kandidati republikan për president të SHBA-së, Donald Trump, ka sulmuar Zonjën e Parë, Michelle Obama, duke thënë se “gjithcka që ajo do të bëjë është fushata” për rivalen e tij.
Ai po ashtu ka akuzuar zonjën e parë se ka sulmuar Hillary Clinton më 2007, duke e cilësuar si të papërshtatshme për të drejtuar Shtëpinë e Bardhë. Kjo gjë qe mohuar nga drejtuesit e fushatës së Obama, transmeton Klan Kosova.
Ndërsa, Clinton ka akuzaur Trump se paraqet kërcënim për demokracionë, sidomos nëse nuk pranon rezultatet e zgjedhjeve.
“Ne e dimë dallimin mes lidershipit dhe diktaturës dhe bartja paqësore e pushtetit është pika ku ndahen këto të dyja”, tha ajo në Cleveland, Ohio.
“Donald Trump nuk ka pranuar të thotë nëse do ta respektojë rezultatin e zgjedhjeve. Me këtë ai ka kërcënuar demokracinë”.
Në një tubim me mbështetësit e tij në North Carolina, Trump u pati thënë mbështetësve se e sheh sa shumë “Michelle Obama e pëlqen Hillary”.
“Por këto nuk ishin bindjet e para të saj. Ajo pati thënë dikur: ‘Nëse nuk kujdesesh dot për shtëpinë tënde, cfarë do të bësh në Shtëpinë e Bardhë’. Ku mbeti kjo bindje. Nuk jam duke e dëgjuar këtë gjë”.