Donald Trump ka njoftuar në rrjetin e tij social “Truth Social” se do të ndalojë prodhimin e monedhave një qindarke.
“Për një kohë të gjatë, Shtetet e Bashkuara të Amerikës kanë grumbulluar qindarka që na kushtojnë më shumë se 2 cent. Është kaq e kotë! Unë e kam drejtuar Sekretarin tim të Thesarit të ndalojë prodhimin e qindarkave të reja. Le të eliminojmë mbeturinat nga buxheti i kombit tonë të madh, edhe nëse ato janë një cent”.
Në thelb, një qindarkë dhe një cent janë e njëjta gjë në kontekstin amerikan, por ka një ndryshim të vogël në përdorimin e termave.
Një cent është njësia bazë e monedhës amerikane dhe përfaqëson 1/100 e një dollari amerikan.
Penny është emri për monedhën 1 cent në Shtetet e Bashkuara të Amerikës, transmeton Telegrafi.
Njoftimi i Trump pasoi një paralajmërim nga Departamenti për Efiçencën e Qeverisë (Doge) i Elon Musk, për koston e prerjes së qindarkave.
SHBA ka debatuar gjatë për kostot dhe përdorimet e qindarkës. Kushton 3.69 cent për të prodhuar dhe shpërndarë një monedhë një cent, sipas raportit vjetor të 2024 për monedhat amerikane.