Presidenti amerikan, Donald Trump ka akuzuar homologun e tij francez, Emmanuel Macron për dërgim të “sinjaleve të ndryshme” në Iran, sa i përket mundësisë së zhvillimit të bisedimeve me Uashingtonin.
“Irani është në gjendje të vështirë financiare. Zyrtarët iranianë janë të dëshpëruar dhe duan të flasin me Shtetet e Bashkuara, mirëpo ata që po pretendojnë të na përfaqësojnë neve, janë duke u dhënë mesazhe të ndryshme, duke përfshirë presidentin Macron të Francës”, ka thënë Trump përmes një postimi në rrjetin social, Twitter.
“Unë e di se Emmanuel ka qëllime të mira, sikur gjithë të tjerët mirëpo askush nuk flet të emër të SHBA-së”, ka shkruar Trump.
Presidenti amerikan është larguar një vit më parë nga marrëveshja bërthamore që Teherani ka nënshkruar me fuqitë botërore më 2015.
Përveç kësaj, Trump ka rikthyer të gjitha sanksionet ndaj këtij shteti duke i dëmtuar sektorin bankar dhe atë të naftës.
Presidenti i SHBA-së ka thënë se ka gatishmëri për të biseduar me liderët iranianë, mirëpo Teherani ka thënë se sanksionet duhet hequr fillimisht.
Franca, bashkë me Britaninë, Gjermaninë, Rusinë dhe Kinën, kanë vazhduar të jenë pjesë e marrëveshjes së vitit 2015, e cila parasheh heqje të sanksioneve për Teheranin, në këmbim të frenimit të aktivitetit bërthamor. /rel/