Donald Trump Jr dhe Kimberly Guilfoyle janë duke bërë lëvizje për të zgjeruar ndikimin e tyre në Komitetin Kombëtar Republikan.
Disa burime thonë se ata mund të kërkojnë të marrin vetë strukturën e partisë, raporton CNN.
Djali i madh i presidentit Trump dhe e dashura e tij, një mbledhëse fondesh për fushatën e Trumpit dhe ish-nikoqire e Fox Newsit, e kanë bërë të qartë se nuk janë kënaqur me kryetaren e RNC-it, Ronna McDaniel, të cilën ata e konsiderojnë se nuk ka bërë aq sa duhet për të fituar zgjedhjet presidenciale amerikane, transmeton Telegrafi.
Trump Jr dhe Guilfoyle mund të kërkojnë role drejtuese në RNC për të pozicionuar komitetin për një rikthim në garën presidenciale.
“Don Jr dhe Kimberly i kanë vënë syrin RNC-it, duke e marrë vetë përsipër ose përmes dikujt pranë tyre”, tha një burim i Partisë Republikane pranë Shtëpisë së Bardhë.
Trump Jr shihet si një figurë popullore në bazën e babait të tij. Nëse Trump Jr dhe Guilfoyle nuk marrin përfundimisht pozicionet zyrtare në RNC, burimet thanë se dikush pranë familjes Trump, siç është këshilltari i fushatës për një kohë të gjatë David Bossie, mund të bëhet kryetar.
“Ata nuk duan që udhëtimi të përfundojë”, tha një këshilltar i Trumpit për Trump Jr dhe Guilfoyle.
Emra të tjerë që dalin në sipërfaqe në kërkimin e udhëheqjes së re të RNC përfshijnë ish-kryetarin dhe shefin e stafit të Shtëpisë së Bardhë, Reince Priebus dhe kryetaren e Partisë Republikane të Ohios, Jane Timken. /Telegrafi/