Incidentet e ndeshjes mes Italisë dhe Shqipërisë nuk do të kalojnë pa pasoja dhe kjo është më se e qartë.
Në pritje të vendimit të FIFA-s për ndëshkimin me gjobë ndaj FSHF-së dhe atë thuajse të sigurt disiplinor ndaj tifozerisë kuqezi, autoritetet e Palermos ka dhënë vendimet e saj për tifozin e arrestuar në stadium për hedhje fishekzjarrësh.
Tifozi ishte pjesë e grupit që hodhi fishekzjarrë në Renzo Barbera duke shkaktuar ndërprerjen e ndeshjes dhe është arrestuar falë identifikimit nëpërmjet pamjeve filmike të kamerave të stadiumit.
Autoritet e Palermos ka dhënë paraprakisht për të masën e përjashtimit nga të gjitha ambientet ku zhvillohen aktivitetet sportive në territorin italian për tre vitet e ardhshme, njofton Panorama Sport.
Ndërkaq, po për këtë ndeshje, janë ndëshkuar edhe katër tifozë të tjerë, shtetas italianë, të cilëve do u mohohet për dy vite hyrja në ambientet sportive. Arsyeja? Kishin kaluar rrethimin me synimin për të ndjekur ndeshjen pa biletë.