Grupi i tifozëve pejanë “Shqiponjat”, një ditë para finales me Sigal Prishtinën që zhvillohet në palestrën “Karagaçi”, kanë bërë thirrje që të jenë të kujdesshëm.
Në një postim në rrjetin social Facebook, “Shqiponjat” kanë bërë thirrje që të kenë kujdes nga lojtarët e Prishtinës, të cilët sipas tyre, synojnë ta ndërprenë ndeshjen e fundit të finales. Këtë “synim” të Prishtinës, ata e kanë quajtur si “kulturë të tyre”.
“Ekipi me të cilin do të ndeshemi do të jetë në gjendje të bëjë çdo gjë që ndeshja të ndërpritet, e që për ne nuk është diçka e re sepse kjo është kultura e tyre. Neve na mbetet që të mos biem në grackën e tyre, dhe të vazhdojmë të anojmë me korrektësi e t’i shtyjmë djemtë tonë drejt titullit kampion”, thuhet në postim.
“Në emër të Shqiponjave ju lus të gjithëve që do të jeni të pranishëm që në asnjë moment të mos hedhet asgjë në parket, por të krijojmë atmosferë të bukur dhe sportive. Shqiponja si shpend fisnik që është nuk e lejon askënd të kalojë lehtë kur futet në folenë e saj, e njëjta do të ndodhë nesër me ‘ata’ që do të tentojnë të hyjnë në folenë tonë. Te gjithë e dimë se çfarë bëjnë Shqiponjat kur ndjehet e kërcënuar, prandaj kurseni provokimet të nderuar”
Tifozët në fund kanë edhe një porosi për gjyqtarët e finales në basketboll. Nga ata kanë kërkuar që të jenë korrektë dhe jo të njëanshëm.
“Referë, nga ju kërkojmë që të jeni korrektë dhe jo të njëanshëm qysh keni qenë disa herë. Mos e ngucni Shqiponjën në folenë e saj”, thuhej në fund të këtij postimi. /Telegrafi/