Të vonshme dhe populiste vlerësohen deklarimet e presidentit të ri Hashim Thaçi se në listat zgjedhore më nuk do të ketë njerëz që kanë probleme me ligjin, raporton KTV.
Betim Musliu nga Instituti i Kosovës për Drejtësi ka thënë se ironia këtu është se këto deklarata po vijnë nga njeriu që udhëhoqi partinë e cila për dy mandate ishte në krye të Qeverisë e që pati në dorë dekriminalizimin e skenës politike.
Por, Musliu pos fjalëve e pret një hap konkret nga presidenti i Republikës, transmeton Koha.net.
Ky veprim sipas Musliut do të dëshmojë nëse presidenti i ri do të ketë fuqi të përballet me bashkëpartiakët e tij të dikurshëm të cilët përballen me gjykata për shkak të shkeljeve të ligjit.
Neni 53 i rregullores së punës së Kuvendit, pika 1 e përcakton që edhe presidenti i Republikës mund të paraqesë propozim për një projektligj.
Ndërkohë për Albert Krasniqin nga KDI-ja këto deklarime të presidentit janë tejet të vonuara kur sipas tij PDK-ja ka qenë kampione me njerëz shkelës të ligjit.