Presidenti i vendit, Hashim Thaçi para takimit me shefen e Politikës së Jashtme të Bashkimit Evropian, Federica Mogherini dhe me presidentin serb, Aleksander Vuçiq në Bruksel në një deklaratë për media tha se Kosova dhe Serbia po hyjnë në një fazë të re të dialogut për arritjen e një marrëveshjeje përfundimtare, historike dhe të paqes.
Thaçi tha se ky proces i dialogut do të shënojë një progres për shtetin e Kosovës dhe Serbinë, për paqen dhe stabilitetin në rajon.
“Jam i vetëdijshëm që do të kemi pengesa dhe vështirësi të mëdha, por ia vlen për të punuar për të shënuar progres”, tha presidenti Thaçi, raporton Telegrafi.
Sipas tij, kjo gjendje dhe ky ‘konflikt i ngrirë’ është i paqëndrueshëm dhe duhet lëvizur drejt një të ardhme euro-atlantike të Kosovës, por edhe të Serbisë.
Presidenti i vendit edhe në Bruksel para takimit me Mogherinin theksoi se marrëveshja përfundimtare Kosovë-Serbi ka kuptim vetëm kur ndodh njohja reciproke dhe që kjo pastaj nënkupton anëtarësimin e Kosovës në OKB.
Ai tha se marrëveshja Kosovë-Serbi nuk duhet të ndërlidhet me çështje tjera në botë.
Sipas tij, po ashtu do të ruhet karakteri multietnik në Kosovë dhe të gjitha tonet kërcënuese sipas tij për luftë dhe refugjatë janë absurde. /Telegrafi/