Dogana e Kosovës ka raportuar sot për një rast ku është tentuar që të futet marihuanë në Kosovë përmes një pakoje postare.
Në njoftim thuhet se më 16 gusht 2023 Njësitet e Doganës së Kosovës në Prishtinë kanë arritur që të zbulojnë substanca narkotike në një dërgese postare qe vinte nga shtetet e huaja.
“Gjatë kontrolleve në Zyrën për Zhdoganimit Postar (Postën Doganore) zyrtarët doganor kanë dyshuar në përmbajtjen e dërgesës duke aluduar në peshën e pakos, përshkrimi se çfarë kishte në pako, e që përbënin indikatorë të mjaftueshëm që kjo pako të ekzaminohej në detaje.
Pas hapjes së pakos janë gjetur qese të vogla me përshkrime tjera por brenda gjendej substanca e dyshuar për marihuanë”, thuhet në njoftim.
Dogana thekson se konform procedurave për mallra të ndaluara është njoftuar Policia e Kosovës — Njësiti Anti Drogë, që kanë konstatuar se rasti ka të bëjë me substancë narkotike e llojit marihuanë.
“Rasti është dorëzuar tek Policia e Kosovës. Sasia e substancës narkotike ishte 115 gramë”, thuhet më tej. /Telegrafi/