Policia Kufitare e Shqipërisë ka njoftuar sot parandalimin dhe goditjen e një rasti të tentativës për trafikim të lëndëve narkotike në kufi me shtetin Grek.
Policia ka arrestuar shtetasin A.A., 45 vjeç, banues në Fier, në pikën kufitare Qafë Botë pasi tentoi të trafikonte një sasi të konsiderueshme lënde narkotike të llojit kanabis sativa drejt Greqisë.
Sipas njoftimit të policisë, 80 kilogramë kanabis sativa dhe një automjet janë sekuestruar në përfundim të operacionit të koduar “Border”.
“Si rezultat i kontrollit të imtësishëm dhe të përbashkët të strukturave që operojnë në pikën e kalimit kufitar Qafë Botë, u bë e mundur që në brendësi të kamionçinës të gjendeshin të fshehura 74 pako me lëndë narkotike kanabis (me peshë 80 kilogramë), të cilat u sekuestruan në cilësinë e provës materiale, së bashku me automjetin tip kamionçinë”, ka shtuar policia.
“Drejtuesi i automjetit, shtetasi A. A. është shoqëruar në Komisariatin e Policisë Sarandë dhe në përfundim të veprimeve të para hetimore të kryera nga specialistët për Hetimin e Narkotikëve është bërë arrestimi në flagrancë i tij, për veprën penale trafikimi i lëndëve narkotike”, ka thekuar policia.
Sipas policisë, në bashkëpunim me Prokurorinë e Rrethit Gjyqësor Sarandë, vijon puna hetimore për identifikimin e personave të tjerë të përfshirë në këtë aktivitet kriminal. /Telegrafi/