Të paktën katër persona humbën jetën gjatë të shtënave në Bankën e Vjetër Kombëtare në Louisville, Kentaki dhe të paktën tetë të tjerë u plagosën, tha policia gjatë një konference për shtyp të hënën.
Sulmuesi është gjithashtu i vdekur, tha Zëvendës Shefi i Policisë Metropolitane të Louisville, kolonel Paul Humphrey.
Të paktën dy oficerë policie u qëlluan gjatë shkëmbimit me zjarr, theksoi Humphrey, transmeton Telegrafi.
Nga të paktën tetë personat e transportuar në spital, dy janë në gjendje kritike, sipas Humphreyt. Një nga ata dy është një oficer policie i cili aktualisht është në operacion, u shpreh ai.
Policia beson se ‘sulmuesi i vetëm’ përgjegjës për të shtënat në Louisville “kishte lidhje me bankën”.
Derisa autoritetet po punojnë për të zbardhur lidhjen, ata thanë se duket se i dyshuari ka qenë një ish-punonjës i bankës.
Policia iu përgjigj brenda tre minutave thirrjes për të shtënat që ndodhën në mëngjes (koha lokale amerikane) dhe u ndeshën pothuajse menjëherë me të dyshuarin, sipas deklaratës së Humphreyt. I dyshuari po gjuante përsëri me armë kur u ndesh me policinë.
Policia kishte shkëmbyer të shtëna me sulmuesin i cili vdiq në vend të ngjarjes, shtoi ai.
Autoritetet tani po përpiqen ta kuptojnë nëse sulmuesi vdiq nga të shtënat me armë zjarri apo nga vetë-plagosja. /Telegrafi/