Marcos ALonso ka pushtuar rrjetet sociale me veprimin që bëri pas finales së Ligës së Kampionëve.
Chelsea fitoi 1-0 ndaj Manchester Cityt në finalen e garës më të madhe për klube në Evropë, fal golit të Kai Havertz.
Më pas filloi festa e bluve, që ishte disi e pazakontë, sidomos në rastin e Alonsos.
Spanjolli kishte marrë ateletet e trajnerit Thomas Tuchel dhe i kishte mbushur me birrë, duke pirë më pas nga ato.
Gjermani ka treguar historinë e atleteve dhe se përse Alonso e bëri atë veprim.
“Kam harruar që i kisha këto atlete në Paris dhe dhashë një premtim se do t’i vishja këto atlete kur të arrinim në finalen e Ligës së Kampionëve”, ka zbuluar Tuchel.
“Ato ishin një dhuratë nga presidenti i PSG. Unë i premtova stafit tim se do t’i vishja kur të shkonim në finale, por unë nuk i vura dhe humbëm. Kështu që unë i vura ato sot dhe funksionoi”.
“Më pas ajo u mbush shpejt me birrë nga një shishe dhe Marcos Alonso piu prej saj”, përfundoi strategu i bluve. /Telegrafi/
