Taylor Swift performoi tre netë me radhë në Melbourne në stadiumin ‘Melbourne Cricket Ground’, ku një rekord prej 96 mijë njerëz e dëgjonin atë çdo natë.
Me këtë, artistja vendosi një rekord për koncertin më të madh nga një interpretuese femër në këtë dekadë.
Megjithatë, ajo që po ndodhte para stadiumit ishte edhe më mbresëlënëse.
Në fakt para stadiumit janë mbledhur mijëra persona të cilët nuk kanë arritur të blejnë biletën, por kanë ardhur për të shijuar muzikën.
Në TikTok u shfaqën informacione se 50 mijë njerëz u mblodhën para stadiumit, por kjo nuk është konfirmuar zyrtarisht.
Pamjet e njerëzve që rrethojnë stadiumin u bënë virale.
“Kjo është e gjithë thelbi i muzikës, sa e mrekullueshme të shohësh kaq shumë njerëz të bashkohen për muzikë”, “Çfarë atmosfere pozitive”, “Swift ka një ushtri” – qenë disa nga komentet.
Pas Melbourne, Taylor Swift do të shkojë në Sydney, ku do të performojë të premten, të shtunën dhe të dielën. /Telegrafi/