Deputetja e Partisë Demokratike, Jorida Tabaku, ka reaguar për herë të parë pas vendimit të Kryesisë së Partisë Demokratike për ta lënë në listë të hapur në zgjedhjet parlamentare të 11 majit.
Përmes një postimi në rrjete sociale, Tabaku shpreh falënderime dhe mirënjohje për të gjithë ata demokratë që e nxorën një ndër kandidatët më të votuar në primare.
Ajo thekson se në PD asgjë nuk i është falur asnjëherë, ndaj e pranon sfidën për të garuar përpara qytetarëve të kryeqytetit dhe për t’iu marrë besimin për t’i përfaqësuar në parlament.
Postimi i plotë i Jorida Tabakut:
Faleminderit demokratëve të Tiranës për besimin!
Fitova primaret me mbështetjen tuaj dhe isha ndër më të votuarit, por sot nis një sfidë të re—betejën për Tiranën në listën e hapur!
Në Partinë Demokratike asgjë nuk më është falur. Çdo betejë e kam fituar me punë dhe përkushtim, dhe ashtu do të ndodhë edhe tani! Do të jem në Parlamentin e ri për të përfaqësuar jo vetëm demokratët që më votuan, por edhe ata që ende nuk e shohin veten të përfaqësuar. Për një ekonomi më të mirë, për shtresën e mesme, për familjet shqiptare, për integrimin Europian dhe për luftën ndaj korrupsionit!
Betejat nuk më trembin! Nuk më trembi komisioni hetimor, as pronarët e inceneratorëve që sot janë në arrati apo në qeli. Nuk më trembi as beteja për profesionet e lira dhe të drejtat e qytetarëve. Ndaj nuk do të më trembë as kjo sfidë!
Për mua nuk ka pasur dhe nuk do të ketë privilegj më të madh sesa të jem zëri i demokratëve dhe të vazhdoj t’ju përfaqësoj me dinjitet dhe vendosmëri!