Anëtari i Kryesisë së Lëvizjes Vetëvendosje, njëherësh ish deputet i kësaj partie, Xhelal Sveçla, në “Debat Plus” me Ermal Pandurin në RTV Dukagjini ka thënë se në LDK ka pasur shumë figura që kanë kundërshtuar koalicionin me Vetëvendosjen.
Ai ka thënë se nuk ka asnjë matje që mund të dëshmojë se ka ndonjë kandidat më popullor se Albin Kurti në garën për kryeministër.
Antari i kryesisë së Lëvizjes Vetëvendosje ka thënë se është dëshmuar se LDK është shumë më e mirë kur bashkëpunon me Lëvizjen Vetëvendosje se sa me PDK-në.
“Një bashkëpunim shumë të frytshëm unë personalisht kam pasur me Driton Selmanajn në rastin e Komisionit hetimor për turqit e dëbuar nga Kosova. I njëjti bashkëpunim ka ardhur edhe nga Anton Quni në komisionin e njëjtë ku unë isha kryetar”, tha ai, përcjell Telegrafi.
Duke folur për aderimin e Agim Bahtirit në Vetëvendosje, Sveçla ka thënë se ai ka qenë bashkëpunëtor i partisë në rastin e bashkimit të Mitrovicës.
“Bahtiri ka pasur presion shumë të madh nga ndërkombëtarët për kufijtë e Mitrovicës. Agim Bahtiri së bashku me kundërshtinë tonë ka penguar ndryshimin e kufijve të Mitrovicës [jugore]”.
Sipas ish-deputetit të Vetëvendosjes, VV në bashkëqeverisje me Agim Bahtirin ka filluar ç’kapjen e Mitrovicës nga SHIK-u.
“Vjedhja më e madhe industriale në vitin 2010 ka ndodhur në Mitrovicë. Në të gjitha zgjedhjet pasuese Agim Bahtiri ka mbrojtur votën e qytetarit”, tha ndër të tjera Xhelal Sveçla. /Telegrafi/