Drejtori i Policisë në Prizren në konsultim dhe me sugjerim të Inspektoratit Policor të Kosovës ka suspenduar për 72 orë një Rreshter Policor pasi nuk kishte reaguar në mënyrë profesionale me rastin e sulmit ndaj ekipit të gazetës Nacionale të protestën e organizuar në Prizren ditën e premte.
Protesta ishte thirrur pas një performance javën e kaluar në kuadër të festivalit DOKUFEST në përkrahje të komunitetit transgjinor, e cila nxiti reagime.
Policia këtë rast e ka cilësuar si rast “Pengim i personit zyrtar në kryerjen e detyrës zyrtare”, ku edhe identifikuar një i dyshimtë dhe ishte ndaluar për 48 orë.
“Dje më datë 11.08.2023 në Prizren është organizuar një protest kundër disa performancave në DokuFest, një festival ndërkombëtar tradicional i filmave dokumentar që mbahet në Prizren.Në atë rast nga protestuesit një gazetar është sulmuar dhe është penguar në kryerjen e detyrës së tij”, thuhet në njoftim.
Vendimi për suspendimin e rreshterit është marr pas analizimit të vlerësimit të raporteve si dhe videove nga protesta.
“Sot Drejtoria Rajonale e Policisë në Prizren së bashku me Inspektoriatin Policor të Kosovës kanë analizuar veprimet policore të policëve që ishin në vend ngjarje gjatë incidentit. Pas vlerësimit dhe analizimit të të gjitha raporteve si dhe videoregjistrimeve gjatë protestës, Drejtori Rajonal i Policisë së Kosovës për Rajonin e Prizrenit, pas konsultimit dhe sugjerimit nga IPK, me qëllimi të hetimit të pavarur të këtij rasti, me vendim ka suspenduar për 72 orë një Rreshter Policor nga Stacioni Policor Prizren”, thuhet më tej nga policia.
Në njoftim theksohet se Policia e Kosovës, Drejtoria Rajonale në Prizren mbetet e përkushtuar për të ofruar ndihmë, rend dhe siguri për të gjithë qytetarët, e veçanërisht për gazetarët me të cilët kanë bashkëpunim të shkëlqyer, të vazhdueshëm dhe profesional. /Telegrafi/