Hip hop ylli i ri, Fero, është rrahur dhe është kërcënuar me armë në njërën prej qendrave tregtare në Prishtinë.
Një vizitë e Feros në një prej qendrave të njohura tregtare në Prishtinë pasoi me një konfrontim fizik.
Një grup i panjohur prej katër personave u konfrontuan me reperin, teksa ai po dilte nga qendra tregtare.
Burimet e Telegrafit konfirmojnë se një veturë ishte ndalur para Feros dhe një personi që po e shoqëronte duke e talluar dhe ofenduar.
Fero besohet se u shmang prej tyre, por këta persona e rrahën, teksa njëri prej personave që e sulmuan besohet ta ketë pasur edhe armën me vete.
Sulmi thuhet të ketë ndodhur pas mesnatës kur Fero doli nga kinemaja në një prej qendrave të njohura tregtare.
Reperi besohet se ka pësuar lëndime të lehta, teksa gjatë incidentit ka pasur edhe dëme materiale.
Fero u bë sensacion së fundmi me intervistat e tij, duke vënë në pah “superioritetin” e tij në krahasim me reperët tjerë.
Ai nuk ka hezituar që shumë herë të injorojë rivalët e tij dhe ata që e ofendonin, teksa kohëve të fundit ishte personazhi më i përfolur. /Telegrafi/