Një video e publikuar nga mediat britanike tregon kryeministren Theresa May derisa nxitohet për tu larguar, në momentin që merret vesh se bëhej fjalë për një sulm afër ndërtesës së Parlamentit britanik.
Por ajo që shkruajnë së fundmi mediat britanike, përcjell Telegrafi, është konfuzioni që krijohet gjatë kësaj ngjarje, nga ana e ekipit të sigurisë së kryeministres.
Madje, sipas tyre, aq shumë kishte konfuzion në këtë ngjarje, sa që sipas ekspertëve, kryeministrja në një moment ishte veçse e pambrojtur – derisa po futej në Jaguar – në rast se ndonjë snajper do të tentonte ta qëllonte atë.
Ken Wharfe, dikur një truproje i Princeshës Diana, ka thënë se videoja zbulon të metat në procedurën e përdorur për të evakuuar kryeministren gjatë një situatë të rrezikshme, përcjell Telegrafi.
“Ka pasur konfuzion se ku ishte makina dhe se kush do të futej në të dhe ajo në atë moment nuk ishte e mbuluar nga rojet e sigurisë”, ka thënë ai. “Kur dikush futet në veturë, ju mbuloni shpinën e tij/saj”.
Ai tha se procedurat e përcaktuara nuk janë ekzekutuar si duhet dhe se si rezultat May ishte e ekspozuar për 10 sekonda, kur policia nuk e dinte nëse ka pasur më shumë sulmues në bazën e Parlamentit apo jashtë perimetrit të saj.
“Ka gjithmonë një rrezik në këtë pikë se mund të jetë një snajper nga jashtë”, tha ai. /Telegrafi/
