Pista kryesore e hetimit të ngjarjes të sulmit ndaj Top Channel është përqendruar në ndonjë konflikt të mundshëm apo mesazhi ndaj drejtuesve te medias ku ndodhi ngjarja, raporton Ora News.
Pas sulmit me armë mbi Top Channel pak pas mesnate, ku mbeti i vrarë roja i sigurisë, Pal Kola, mësohet se 60-vjeçari humbi jetën gjatë rrugës për në spital, duke u transportuar me ambulancë.
Nga hetimet e ngjarjes në Mëzez, mësohet se një automjeti i tipit “Range Rover” ka qenë në ecje dhe prej aty një person ka qëlluar me breshëri kallashnikovi drejt fasadës së këtij televizioni. Dyshohet se në makinë kanë qenë të paktën dy persona.
Në terren janë rreth 25 gëzhoja që janë gjetur nga grupi i hetimit, anëtarët e të cilit mësohet se pasi kanë mbledhur gëzhojat, kanë sekuestruar kamerat e vëzhgimit në zonë; si dhe të gjitha provat e mundshme për zbulimin e kësaj ngjarjeje.
Pal Kola ishte në detyrë, përpara hyrjes së godinës, në momentin kur u qëllua. Pas ngjarjes u gjet një automjet Range Rover i djegur plotësisht në autostradën Tiranë-Durrës, në Golem të Kavajës.
