Bisedimet për shitblerje të armëve mes Rusisë dhe Koresë së Veriut po avancojnë në mënyrë aktive, tha zyrtari amerikan duke paralajmëruar liderin verikorean Kim Jong-unn që vendi i tij do të paguaj çmimin për shkak të dërgimit të armëve në Moskë, që do të përdoren në Ukrainë.
Dërgimi i armëve në Rusi “do të ndikojë tek Koreja e Veriut e cila do të paguaj çmimin e këtij veprimi në komunitetin ndërkombëtar”, theksoi Këshilltari për Siguri Kombëtare në SHBA, Jake Sullivan, gjatë një konference për media në Shtëpinë e Bardhë, transmeton Telegrafi.
E përditshmja amerikane New York Times ka njoftuar të hënën duke u thirrur në burim brenda qeverisë amerikane, se Kim planifikon këtë muaj të vizitojë Rusinë për t’u takuar dhe diskutuar me presidentin rus Vladimir Putin, për mundësinë e shitjes së armëve për luftën në Ukrainë.
Në anën tjetër, Kremlini tha sot se “nuk ka çfarë të thotë” lidhur me këto pretendime.
“Ndërkaq Kim pret që bisedimet për armë të vazhdojnë”, shtoi Sullivan, që sipas tij takimi do të jetë kokë më kokë.
“Do të vazhdojmë t’i bëjmë thirrje Koresë së Veriut që t’i përmbahet obligimeve të saj dhe të mos i dërgojë armë Rusisë që do t’i përdorë për vrasjen e ukrainasve”, porositi Sullivan. /Telegrafi/