Ministri i Transportit dhe Lidhjeve Goran Sugareski, së bashku me ministrin e Ekonomisë Kreshnik Bekteshi, sot kanë inspektuar nga afër punimet në ndërtimin e gazsjellësit magjistral Shkup-Tetovë-Gostivar.
Sugareski tha se ndërtimet e rrjetit gazsjellës zhvillohen me temp të fuqishëm dhe pritet që gjatë vitit 2020 të përfundojë, përcjell Telegrafi Maqedoni.
“Gazifikimi i vendit është prioritet i lartë i joni dhe jemi maksimalisht të përkushtuar në ndërtimin e gazsjellësit magjistral. Kemi rreth 90 përqind realizim këtë vit, gjegjësisht janë investuar rreth 1 miliardë e 300 milionë denarë”, tha Sugareski.
Ministri i Ekonomisë Kreshnik Bekteshi, tha se distribuimi i rrjetit do të ndërtohet përmes partneritetit privato-publik, për të cilin siç tha, qeveria tashmë ka formuar komision.
Ndërsa sipas drejtorit të Resurseve Energjetike Kombëtare Bajram Rexhepi, gazsjellësi magjistral Shkup-Tetovë-Gostivar, do të përfundojë në gjysmën e parë të vitit të ardhshëm. Ai ta se menjëherë do të fillojë testimi, ndërsa në fund të vitit 2020 do të fillojë të përdoret gazi.
Ndryshe, gazsjellësi Shkup-Tetovë-Gostivar është me gjatësi prej 86 kilometrave, ndërsa vlera e investimit thuhet të jetë 29 milionë euro./Telegrafi/