Telegrafi

Stano: Kurti duket se është i vendosur ta hapë Urën e Ibrit

Zëdhënësi i Bashkimit Evropian, Peter Stano, sërish ka komentuar veprimet e Qeverisë së Kosovës për hapjen e Urës së Ibrit, duke ripërsëritur se vendimi për hapjen e saj duhet të merret përmes dialogut në Bruksel. Ai tha se kryeministri i Kosovës, Albin Kurti, duket se është i vendosur ta hap urën. 

Stano, në një intervistë për median serbe “N1”, ka thënë se urat janë për bashkim të njerëzve, por thotë se ajo e Ibrit është “çështje shpërthyese dhe problematike që duhet të zgjidhet me dialog”.

“Urat zakonisht i bashkojnë njerëzit. Fatkeqësisht, situata që kemi në veri të Kosovës dhe në Mitrovicë është rezultat i një numri të madh rrethanash të vështira politike. Prandaj kemi thënë gjithmonë se është një çështje shpërthyese, një çështje problematike dhe si të gjitha çështjet problematike duhet të zgjidhet me dialog. Sepse nëse keni një problem, atëherë e zgjidhni me dialog, jo me vendime të njëanshme”, ka thënë Stano.

Stano gjithashtu ka thënë se “javën e kaluar, të gjithë miqtë e Kosovës, SHBA, vendet më të rëndësishme dhe Bashkimi Evropian, shkuan te kryeministri Albin Kurti dhe i thanë: “Mos e bëj këtë, mos bëj lëvizje të njëanshme, mos e hap urën. Por ai duket i vendosur ta bëjë këtë. Prandaj thamë, ‘jo, do të ketë efekte shumë negative’. Kërkojmë nga autoritetet të parandalojnë dhe shmangin hapat që do të çojnë në konfrontime dhe përshkallëzim më të madh. Sepse i lëndon njerëzit në terren dhe ju dhemb edhe juve, sepse Kosova është nën masat e BE-së dhe nën disa masa të ShBA-së për shkak të ndërmarrjes së përsëritur dhe të provuar të lëvizjeve që çojnë në përshkallëzim. Kjo Nuk i ndihmon askujt, përkundrazi, ndikon shumë negativisht te një numër i madh njerëzish”.

Lexo po ashtu Kurti fton serbët në bashkëbisedim: Ta bëjmë Urën e Ibrit simbol të normalizimit

Më tej, ai tha se “Bashkimi Evropian nuk është një forcë intervenuese. Ne nuk duam t’u imponojmë partnerëve tanë gjëra që populli, popullata vendase, mund t’i konsiderojë si ndërhyrje në punët e brendshme. Pikërisht për këtë ne punojmë si ndërmjetës në dialog. Ndërmjetësi është si një mësues i mirë, i cili përpiqet të bëjë që dy nxënës kokëfortë të arrijnë ndonjë rezultat. Në këtë rast, ata të fillojnë të trajtojnë njëri-tjetrin normalisht”.

“Ne këto nuk mund t’ua imponojnë atyre. Nëse ata nuk duan – na vjen keq. Ata nuk do të përparojnë, por do të ndëshkojnë veten dhe do të ndëshkojnë popujt e tyre dhe nuk do t’i afrohen BE-së. Sepse ata vetë thanë: ‘Ne duam të jemi pjesë e klubit tuaj evropian’. Pastaj Bashkimi Evropian tha: ‘Në rregull. Këto janë kushtet dhe ju lutemi plotësoni ato. Nëse nuk i plotëson, nuk do të jesh pjesë e klubit’”.

Stano më tej ka thënë se “Serbia dhe Kosova kanë thënë se duan të anëtarësohen në BE. Atëherë duhet të ndiqni rregullat dhe rregullat thonë se kërkohen marrëdhënie të mira fqinjësore. Nëse nuk i keni, atëherë duhet të punoni për pajtim dhe normalizim. Ne do të ndihmojmë. Dhe ne vazhdojmë të ndihmojmë, sepse besojmë se mund të funksionojë…”, ka thënë Stano.

Në lidhje me zhvillimet e fundit në veri, siç është mbyllja e pikave ilegale të Postës së Serbisë, Stano tha se “problemi që e shohim gjithnjë e më shumë në dialogun ndërmjet Kosovës dhe Serbisë është se jemi vazhdimisht në gjendje krize, në modalitet të zgjidhjes së krizës”. /Telegrafi/