Zëdhënës i Bashkimit Evropian për Politikë të Jashtme dhe Siguri, Peter Stano, nuk ka dhënë hollësi për tërheqjen e letrës së ish-kryeministres së Serbisë, Ana Brnabiq, për moszbatim të Marrëveshjes së Ohrit.
Stano është pyetur se kur e ka njoftuar Serbia BE-në për tërheqjen e këtij qëndrimi dhe në çfarë mënyre Serbia e ka njoftuar BE-në.
“Përsëri, në emër të Bashkimit Evropian atë që tha përfaqësuesi special i BE-së në terren në Prishtinë javën e kaluar, kështu që nuk ka nevojë të përsëritet. Pse, kur, si, dhe nëse Serbia ka bërë diçka apo nuk ka bërë diçka, kjo u takon autoriteteve serbe që ta adresojnë këtë pyetje. Por, mund të përsëris se cili ishte qëndrimi, dhe qëndrimi i vazhdueshëm i Bashkimit Evropian që nga dita e parë pas arritjes së Marrëveshjes së Ohrit. Kjo është një marrëveshje ligjërisht e detyrueshme dhe të dyja palët kanë për detyrë ta zbatojnë atë. Kjo është fiksuar në një nga nenet e saj ku thuhet se kjo marrëveshje po bëhet pjesë e rrugës së tyre të anëtarësimit në Bashkimin Evropian. Pra është ligjërisht e detyrueshme, është rënë dakord në Ohër dhe të dyja palët duhet të punojnë pa vonesa të mëtejshme për zbatimin e kësaj marrëveshjeje”, tha Stano.
Stano ka insistuar se Serbia ashtu edhe Kosova kanë për detyrë të zbatojnë marrëveshjen e Ohrit në të kundërtën, sipas tij, nuk do të mund të vazhdojnë në rrugën drejt BE-së.
“Nuk do ta përsëris atë që tashmë ka thënë përfaqësuesi special i BE-së, mund të theksoj vetëm atë që u kap në një numër komentesh të qëndrimeve të BE-së, përfshirë edhe nga shtetet anëtare, dhe është përfshirë edhe në konkluzionet evropiane, konkluzionet e Këshillit Evropian që si Serbia ashtu edhe Kosova ka për detyrë të zbatojë marrëveshjen e Ohrit dhe nëse nuk e bën, nuk do të mund të vazhdojë në rrugën drejt BE-së. Është shumë e qartë, kështu që për ne ky është dokumenti përfundimtar dhe detyrues sipas së drejtës ndërkombëtare për të dyja, për Kosovën dhe Serbinë, dhe nuk nevojiten hapa të mëtejshëm për ta zbatuar apo për t’u zbatuar, çfarë na duhet tani, dhe ky është një mesazh i përsëritur si për Beogradin ashtu edhe për Prishtinën, nga Brukseli, nga kryeqytetet e vendeve anëtare të BE-së dhe gjithashtu nga Uashingtoni, se ajo që duhet bërë tani është zbatimi. Sepse nëse nuk ka zbatim, epo, nuk do të ketë përparim në rrugën e anëtarësimit”, shtoi ai.
I dërguari i Bashkimit Evropian për dialogun Kosovë-Serbi, Miroslav Lajçak, tha se Serbia ka tërhequr letrën dërguar bllokut vitin e kaluar, ku shprehte rezerva për Marrëveshjen në rrugën drejt normalizimit të raporteve. /kp/Telegrafi/