Dhjetëra specializantë të financuar nga Ministria e Shëndetësisë (MSh) për shkollim specialistik kanë protestuar për mosekzekutim të shtesave. Specializantët pas disa kërkesave për pagesa shtesë, të martën i zunë derën e ministrisë që udhëhiqet nga Armend Zemajt për të shpalosur pakënaqësitë e tyre për mospagesa edhe të kujdestarive.
Përfaqësuesja e specializantëve, doktoresha Vlora Demolli kërkoi nga ministri Zemaj që gjithë mjekët të paguhen njësojë, e jo të bëhen dallime ndërmjet tyre.
“Jemi ardh këtu për shkak të pakënaqësisë që kemi për shkak të mos përfshirjes në subvencione. Është një vendim që ministria e ka marrë për përfshirjen e të gjithë personelit shëndetësor pa marrë parasysh kontrata e punës që i kanë ku përfshihen shtesat. Përveç kësaj neve si specializantë në subvencione nuk janë marrë edhe kujdestaritë me persona Covid që i kemi mbajtur. Përveç shtesave që nuk janë dal prej gushtit e këndej edhe gjithashtu kemi vonesa të pagave që i kemi pasur paga të rregullta si subvencion prej Ministrisë së Shëndetësisë. Tash jemi në dhjetor dhe akoma nuk i kemi marrë pagat e nëntorit dhe kujdestarit i kemi të paguara”, tha ajo.
Pavarësisht mos pagesave, Demolli tha se do të vazhdojnë të përkujdesen për pacientët.
“Ne si mjek e kemi për detyrë me u përkujdes për pacientët tonë. Por ne kemi parë të arsyeshme që krejt mjekët me u përfaqësuar njëjtë. Obligim i joni është me mbajt kujdestarinë dhe me u përkujdes për pacientët. Mirëpo pagesa duhet me u bë njëjtë dhe të trajtohemi të gjithë njëjtë, pasi punën e bëjmë, ama pagesa nuk marrim”, tha ajo për kp.
Specializantët edhe në të kaluarën kanë protestuar duke i kërkuar shtesat e premtuara nga ministri i Shëndetësisë, Armend Zemaj.