Analisti politik, Nexhmedin Spahiu në një intervistë për Telegrafin me gazetar Muhamet Hajrullahu, ka folur për çështjen e vrasjes së politikanit serb në Mitrovicë, Oliver Ivanoviq.
Spahiu tha se Beogradi e ka viktimizuar Oliver Ivanoviqin në mënyrë që të përfitojë procese tjera, mirëpo sipas tij, rezultatet e pritshmërisë së tyre janë të kundërta.
“Rezultatet e vrasjes së Oliverit mund të jenë krejt të kundërta nga ato që kanë pritur porositësit e vrasësit së tij. Kjo ka ndodhur sepse Oliveri është konsideruar kundërshtar politik i Aleksander Vuçiq. Beogradi ka vendos me viktimizu Oliverin në mënyrë që të përfitojë procese tjera, si të zgjasë punën e dialogut, të zbehë imazhin e Kosovës për të treguar se institucionet e Kosovës janë të brishta. E gjithë kjo mori faktorësh ka bërë që Serbia ta eliminojë atë”, ka thënë Spahiu.
Ai po ashtu tha se serbët në Mitrovicë dhe gjithandej Kosovës janë të frikësuar pas kësaj vrasje.
“Pavarësisht mendimeve të shqiptarëve se çfarë ka bërë Oliveri në luftë, serbët e Kosovës e shikojnë si njeriun e Kosovës që ka bërë gjithçka për ta. Kjo vrasje për serbët e Kosovës është sikur të vritet Jezus Krishti”, u shpreh tutje Spahiu.
Sipas tij, atentati i Oliverit është bërë që të krijohet ndasi në mes shqiptarëve dhe serbëve.
“Por unë po shoh afrimin mes komunitetit shqiptarë dhe serb. Po shoh që serbët janë duke thënë që se kanë vrarë shqiptarët por serbët”, u shpreh tutje ai. /Telegrafi/
