Javën që lamë pas Qeveria e Kosovës në mbledhjen e saj, mori vendim që Projektligji për ratifikimin e marrëveshjes për Demarkacionin me Malin e Zi të dërgohet në Kuvend.
Ndërkaq, Komisioni për Punë të Jashtme i Kuvendit të Kosovës do të mbajë sot mbledhjen e saj në të cilën do të behët edhe shqyrtimi i Projektligjit për ratifikimin e Demarkacionit.
Telegrafi dje ka raportuar se sot po ashtu pritet të caktohet edhe data e mbajtjes së seancës ku edhe do të hidhet në votim marrëveshja e për kufirin me Malin e Zi.
Ratifikimi i marrëveshjes së Demarkacionit pritet të bëhet në seancë të rregullt plenare, e jo në seancë të jashtëzakonshme siç është folur më parë.
Në anën tjetër njohësit e çështjeve politike dhe analistët, i kanë thënë Telegrafit se mbetet ende e paqartë se si do të jetë rezultati i votimit në Kuvend.
Po ashtu ata kanë theksuar se marrëveshje të tilla mund të prodhojë mospajtime të mëdha, dhe një gjë e tillë sipas tyre nuk duhet të ndodhë.
Pavarësisht insistimit të pozitës që të bëhet ratifikimi i kësaj marrëveshje, opozita vazhdon t’i qëndrojë prapa kauzës së tyre se një gjë e tillë nuk bënë të ndodhë.
Në anën tjetër banorët i kanë kërkuar Qeverisë së Kosovës, Komisionit Shtetëror për Demarkacionin e kufirit me Malin e Zi, që urgjentisht të merren masa në ketë drejtim që të mos lejojnë autoritetet e Malit të Zi të bëjnë ndarje kufitare sipas dëshirës së tyre, ngase shumë hektarë të zonës së Rugovës e Komunës së Istogut do të aneksohen në mënyrë paqësore nga Mali i Zi. /Telegrafi/