Dhjetëra kalimtarë kalojnë binarët pa kthyer kokën anash. Janë bërë pothuajse pesëmbëdhjetë vjet që nuk është dëgjuar sirena e trenit, që në vitet tetëdhjetë kishte frymëzuar “Gjurmët” që me “Në tren për Perzeren” t’i këndonin dashurisë dhe uzdajës.
Por nuk ka shpresë se treni do t’i kthehet qytetit jugor në të ardhmen e afërt. Madje edhe binarët para stacionit janë mbuluar me beton e mbeturina. Vetëm një punëtor qëndron në njërën prej “zyrave”, që në fakt duken si ngrehina të lëna pas dore, shkruan sot “Koha Ditore”.
Dikur 200, tani veç 2 punëtorë
Xhamat e stacionit janë thyer. Brenda shihen karrige, tavolina e inventar i rrokullisur. Duket qartë se askush nuk kujdeset për pronën publike të hekurudhave të Kosovës. Është vetëm një punëtor që qëndron në njërin prej lokaleve. Në objekt nuk ka ujë e as energji elektrike. Disa shishe i ka vendosur pranë tavolinës së vjetër. I shërbejnë për pije dhe kryerje të nevojave fiziologjike.
Në pjesën e jashtme të mbuluar, në ballë të stacionit, pusetave u mungojnë kapakët e çeliktë. Faqet dhe shtyllat e betonta janë shkruar e shkarravitur me porosi të ndryshme e emra të rinjsh. Mesazhet janë lënë me turlifarë ngjyrash spreji.
Kalimtarët e inervistuar, që jetojnë në zonën përreth, thonë se nuk habiten me gjendjen aktuale të stacionit. /koha/