Federata e Sindikatave të Shëndetësisë së Kosovës i ka bërë thirrjes Qeverisë që me Projektligjin e buxhetit të ardhshëm të parashihet edhe Ligji i Pagave.
Në komunikatën e FSSHK-së thuhet se ngatërrimet që ishin bërë pa qëllim mes Ligjit për zyrtarët publik dhe atij të Pagave te lajmi lidhur për zgjatjen e masës së pezullimit nga Kushtetuesja kanë krijuar tensione shtesë tek të gjithë anëtarësia e FSSHK-së.
“Tensionet janë shtuar edhe më tepër nga lajmi i shpërndarë, që urojmë të mos jetë i saktë, se Ministria e Financave duke përgatitur Projektligjin e buxhetit për vitin 2020 nuk do të planifikojë fare mjete për implementimin e Ligjit të pagave”, thuhet në komunikatë.
Nëse Ministria për Financa nuk bën planifikime buxhetore për Ligjin e pagave dhe Qeveria përkrah një ide të tillë, atëherë në tërë sistemin shëndetësor do të përsëritej situata e fundit e dhjetorit të vitit të kaluar, gjegjësisht bazuar në kërkesat e anëtarësisë do të ketë veprime sindikale në nivel vendi në të gjitha institucionet shëndetësore primare, sekondare dhe terciare.
FSSHK-së i drejtohet kryeministrit Kurti dhe Qeverisë së Republikës së Kosovës që duke planifikuar Projektligjin për buxhetin e vitit 2020 të mos e harrojnë Ligjin e pagave, implementimin e të cilit thuhet se me të drejtë e presin mijëra të punësuar në sektorin publik, e mes tyre edhe ata në sektorin të shëndetësisë.
“Mijëra anëtarë të FSSHK-së besojnë fuqishëm se Kushtetuesja do të jep ndonjë vërejtje, por Ligji i pagave do të nis së zbatuari dhe pastaj Parlamenti do të bëj përmirësimet. Kërkojmë nga Ministria për Financa që të bëjë planifikime buxhetore për Ligjin e pagave dhe Qeveria të përkrah një ide të tillë”.
Më tej thuhet se FSSHK do të jetë gjithmonë e gatshme në çdo kohë që të zhvilloj dialogun social për interesa të anëtarësisë së vet me institucionet shtetërore të Republikës së Kosovës. /Telegrafi/