Mund të mos ndodhë brenda natës, por prindërit mund dhe duhet t’i ndihmojnë fëmijët të mësohen me dhomën e tyre
Hapi i parë: Të kuptuarit
Para se të bëni ndonjë gjë, sigurohuni që të kuptoni pse fëmija juaj dëshiron të flejë me ju në shtratin tuaj.
Me shumë mundësi, kjo është thjesht sepse ai ju do dhe ndihet më i sigurt me ju, por përpara se të filloni ta ndryshoni këtë zakon, sigurohuni që fëmija juaj është gati për të dhe mund ta përballojë këtë ndryshim, shkruan “Harvard Health Publishing”, transmeton Telegrafi.
Hapi i dytë: Ndryshimi i zakoneve
Ndryshimi i vendit ku fle fëmija juaj ndryshon edhe zakonin e tij. Kur bëhet fjalë për ndryshimin e zakoneve, duhet të jeni të qëndrueshëm dhe ja si ta bëni këtë:
▪ Krijoni një zonë tërheqëse gjumi për fëmijën tuaj. Dekoroni dhomën së bashku dhe dëgjoni dëshirat e tij. Gjatë rregullimit të hapësirës, mbani në mend atë që e mban zgjuar fëmijën tuaj.
▪ Nëse bëhet fjalë për dritën, përdorni perde që errësojnë dhomën.
▪ Vendosni një orar të gjumit dhe jini të qëndrueshëm.
▪ Kini një rutinë të qëndrueshme, qetësuese dhe kuruese para se të shkojë në shtrat. Mundohuni të ulni nivelin e tij të energjisë, ndoshta duke bërë një banjë dhe më pas duke lexuar tregime.
▪ Nëse fëmija juaj e ka të vështirë të shkojë në shtrat, është mirë që fillimisht të qëndroni në dhomë me të derisa ta zërë gjumi.
▪ Nëse fëmija juaj ngrihet nga shtrati, vendoseni përsëri në shtrat. Kjo mund të jetë pjesa më e vështirë.
▪ Lavdëroni fëmijën për çdo hap të ri. /Telegrafi/