Me datat 24 dhe 25 tetor u mbajt edicioni i tetë i festivalit të teknologjisë KosICT, duke mbajtur epitetin e njërës prej konferencave më të mëdha rajonale në fushën e TIK, njëherësh duke ofruar një agjendë shumë interesante për vizitorët.
Konferenca ishte vend takimi rreth 3500 entuziastëve dhe profesionistëve kombëtarë e ndërkombëtarë të teknologjisë.
Gjatë dy ditëve, paralelisht janë mbajtur fjalime në skenën kryesore dhe atë të zhvilluesve (Dev Stage).
Përderisa, skena kryesore ka pritur figura të cilët folën për tema si Big Data, rëndësinë e brendimit, Outsourcing, rëndësinë e TIK, bankimin digjital, etj, në anën tjetër skena e zhvilluesve (Dev Stage) ishte vendtakimi i programerëve, zhvilluesve të inxhinierëve të cilët detajisht praktikuan punën e tyre.
Vlen të theksohet se pjesë e konferencës ishin edhe 16 Start-up, pjesë e inkubatorit të Innovation Center Kosovo (ICK), të cilët promovuan produktet dhe shërbimet e tyre para shumë vizitorëve në Panairin e Inovacionit.
Në ditën e parë, hapësirë iu dha edhe gjeneratës së re të zhvilluesve, ku rreth 25 fëmijë nga Shkolla Digjitale mbajtën garën “Hackathon” e të cilët në fund të ditës prezantuan para publikut punën e tyre.
Pjesë interesante e ditës së dytë ishte gara e lojës ‘League of Legends’ në mes të grupeve ‘Struga Esports’, Respawn Esports dhe Omegaforce e cila mblodhi në një vend shumë entuziastë të lojërave elektronike.
Për të gjithë të interesuarit, edicionin e nëntë të konferencës do të mund ta ndiqni me 29 dhe 30 tetor 2020.
Ndryshe, Ambasadori i Gjermanisë në Prishtinë, Christian Heldt, ka qenë pjesë e KosICT, ku ka theksuar se Kosova ka potencial të madh për të arritur në fushën e teknologjisë, por fatkeqësisht nuk vlerësohet nga jashtë. /Telegrafi/