Stephen Curry ka qëndruar në bankën rezervë në çerekët e katërt, në të shumtën e ndeshjeve këtë stinor, meqë skuadra e tij Golden State Warriors, kampione e NBA-së, siguronte më herët avantazh të madh dhe ai, si lojtari kryesor, ulej në bankë për t’u kursyer.
Por, basketbollisti më i mirë i stinorit të kaluar të NBA-së, u ul në bankë shumë më herët kundër Phoenix Sunsave të shtunën mbrëma, pasi bëri gabimin e katërt personal në mesin e çerekut të tretë, transmeton “Koha Ditore”.
Kjo doli të ishte bekim, e jo mallkim për kampionin në fuqi të NBA-së.
Curry u kthye në parket dhe shënoi 15 nga 35 pikët e tij në çerekun e katërt, ndërsa Warriorsat përmbysën një disavantazh prej nëntë pikëve gjatë 12 minutave të fundit të ndeshjes dhe triumfuan ndaj Phoenixit me shifrat 123:116.