Një punonjës policie ka mbetur i plagosur në gjendje të rëndë pasi ka shpërthyer goma e një kamioni.
Policia bën të ditur se rreth orës 14:00, në vendin e quajtur ‘Qenok’, në aksin rrugor Maqellarë-Peshkopi, një mjet i tonazhit të rëndë kamion ka pësuar defekt duke bllokuar aksin rrugor.
Sipas njoftimit të Policisë së Shtetit bëhet e ditur se menjëherë patrulla e policisë rrugore ka shkuar në vendin e ngjarjes me qëllim menaxhimin dhe hapjen e trafikut për automjetet.
Gjatë momentit që punonjësi i Policisë Rrugore po rregullonte trafikun, ka plasur njëra nga gomat e kamionit dhe është lënduar rëndë punonjësi i policisë rrugore shtetasi T.T.
Punonjësi i Policisë është dërguar në spital dhe ndodhet në gjendje të rëndë shëndetësore pasi ka dëmtuar të dy këmbët.
Punonjësi i policisë do të transportohet me helikopter në drejtim të Tiranës. /Telegrafi/
