Periskopi ka kuptuar nga burime të veta se Shpend Ahmeti, Dardan Sejdiu dhe të tjerë anëtarë, kanë ofruar dorëheqjet nga Kryesia.
“Edhe Shpendi, edhe Dardani, edhe plot te tjerë i kanë ofruar dorëheqjet e veta nga Kryesia. Madje, që të gjithë kanë kërkuar të mos kandidohen më për Kryesi”, thotë një burim brenda VV-së.
Mbledhja e Kryesisë së VV-së po mbahet pasi që u kuptua edhe publikisht për fërkimet brenda VV-së. Deputetët e zyrtarët e lartë të partisë janë ndarë në dy taborë. E gjithë kjo u kuptua pas rrjedhjes së disa shkëmbimeve të mesazheve mes Qendrës së VV-së në Tiranë dhe kryetarit të VV-së, Visar Ymeri.
Më pas, në media doli edhe fyerja që deputetja Aida Dërguti i kishte bërë Albin Kurtit në grupin e përbashkët të komunikimit të anëtarëve të Kryesisë.
Tashmë dorëheqje nga Kryesia dhe pozita e kryetarit të Qendrës në Vushtrri ka dhënë Aida Dërguti, derisa u kuptua se dorëheqje nga Kryesia kanë dhënë më herët edhe deputetet Albulena Haxhiu dhe Donika Kadaj-Bujupi.