Shoqata e Invalidëve të Luftës së Ushtrisë Çlirimtare të Kosovës, ka kundërshtuar vendimin e Qeverisë në detyrë që protezat për invalidët e luftës të bëhen në Klinikën e Ortopedisë në Qendrën Klinike Universitare të Kosovës.
Përmes një letre publike, kjo shoqatë ka thënë se klinikat në Kosovë nuk kanë kapacitete teknike dhe as specialistë të fushës për t’i bërë këto proteza.
Ata i janë drejtuar kryeministrit në detyrë, Avdullah Hoti, duke i thënë se qasja ndaj invalidëve të luftës është e gabuar dhe se buxheti i shtetit nuk duhet të tkurret në protezat e atyre që i lanë gjymtyrët e trupit në luftën për liri.
“Proteza e invalidëve janë vërë jashtë Kosovës, mbulimin e shpenzimeve e ka bërë gjithmonë Qeveria e Kosovës, andaj shqyrtojeni vendimin për proteza, përndryshe këta individë me gjymtyrët e humbura në luftë dhe protezat e amortizuara do të protestojnë javën që vjen”, thuhet ndër të tjera në reagim.
Ndryshe, Qeveria e Kosovës dje ka marrë vendim që autorizohet Klinika e Ortopedisë për të furnizimin dhe rregullimin e protezave për invalidët e luftës. /Telegrafi/
