Negociatat rreth çështjes së emrit mes Maqedonisë dhe Greqisë kanë dhënë edhe rezultatet e para. Pas largimit të tabelave në autostradë, ka filluar edhe largimi i shkronjave nga ndërtesa e terminalit të aeroportit të deritanishëm “Aleksandri i Madh”.
Largimi ka filluar si rezultat i vendimit qeveritar të 4 shkurtit për riemërimin e aeroportit të Shkupit.
Emri i ri i aeroporit do të jetë “Aeroporti Ndërkombëtar i Shkupit” (Skopje International Airport), përcjell Telegrafi Maqedoni.
Riemërimi i aeroportit por edhe i autostradës për në Greqi, u paralajmëruan nga kryeministri Zoran Zaev më 24 janar, pas takimit me kryeministrin grek Aleksis Tsipras më Davos të Zvicrës.
Për herë të parë, shefi i diplomacisë greke Nikos Kotzias do të vijë këto ditë në Maqedoni dhe pikërisht në këtë aeroport. Më herët, shkaku i emrit ai ka ardhë në Maqedoni me veturë. /Telegrafi/
