Një marrëveshje shkëmbimi që përfshinte mesfushorin e Interit, Marcelo Brozovic dhe atë të Paris Saint-Germain, Leandro Paredes, thuhet se dështoi në ditën e fundit të afatit kalimtar veror.
Sipas mediumit italian La Gazzetta dello Sport, mesfushori kroat ishte afër largimit nga Interi gjatë afatit kalimtar veror që u mbyll në tetor.
Marrëdhënia midis lojtarit dhe klubit dukej e përkeqësuar pasi 28-vjeçari kishte bërë ‘skena’ në një dhomë urgjence të një spitali në Milano në muajin korrik.
Brozovic thuhet se donte që spitali të linte që shoku i tij, një 42-vjeçar kroat me një dëmtim të lehtë në këmbë, të kapërcente vijën dhe të tejkalonte pacientët e tjerë me probleme më serioze. Policia është dashur të ndërhyjë për ta qetësuar.
Sipas La Gazzetta dello Sport, ai ishte afër bashkimit me PSG-në në një marrëveshje shkëmbimi me Paredes, i cili tani është edhe një herë i lidhur me gjigandët e Serie A të cilët po kërkojnë të largojnë Christian Eriksen.
“Ai ishte tashmë një ish-lojtar i Interit, por marrëveshja dështoi në ditën e fundit”, thuhet në raportin e mediumit italian.
Brozovic ka një gol dhe një asistim në 11 paraqitje në të gjitha garat deri më tani këtë sezon. /Telegrafi/