Një veprim i hoxhës së fshatit, i preku fort banorët e fshatit Fortesë në komunën e Rahovecit.
Të dielën, ata panë se imami i tyre Bedri Bytyçi, shkroi në Facebook, duke kërkuar që Hilmi Haradinaj, të bojkotohet nga hoxhallarët për ceremoninë mortore.
Prandaj, u mblodhën dhe vendosën që ta shkarkojnë atë.
Sipas Bashkësisë Islame të Rahovecit, Bytyqi, nuk ka qenë Imam me kontratë nga Bashkësia Islame e Kosovës, por në marrëveshje me disa fshatarë, është vendosur të shërbejë në këtë fshat.
“Deklaratat e Bedri Bytyqit në lidhje me varrimin e babait te vëllezërve Haradinaj është në kundërshtim të plotë me parimet e fesë islame, andaj si të tilla janë të papranueshme.
Bedri Bytyqi edhe pse ne media është paraqitur si imam i xhamisë në fshatin Fortesë, në fakt ai nuk është imam i kontraktuar nga BIK-u, por personi në fjalë ka bërë marrëveshje me disa xhemat-li që të shërbejë në këtë fshat si imam si dhe ka qenë kandidat i cili ka marrë pjesë në konkursin e shpallur për imam në xhaminë e fshatit Fortesë.
Bytyqi, ka qenë në procedurë të verifikimit, e që pas kësaj deklarate të papërgjegjshme të tij, çështja e punësimit të tij në KBI Rahovec është e mbyllur dhe ai nuk mund të jetë imam i ndonjë xhamie të këshillit tonë”, thuhet në kumtesën e Bashkësisë Islame të Rahovecit. /Telegrafi/
