Shefi i Grupit Parlamentar të Nismës Socialdemokrate, Bilall Sherfi, ka këshilluar zyrtarët policor ndaj të cilëve është ngritur kallëzim penal për rastin e deportimit të gjashtë shtetasve turq nga Kosova.
Sherifi ka thënë se, Prokuroria Speciale ka ngritur padi penale kundër policëve, e që sipas tij, të gjithë e dinë që nuk kanë bërë asgjë përveçse kanë zbatuar urdhrat e eprorëve të tyre, transmeton Telegrafi.
Prandaj, Sherifi ka thënë se këshilla e tij publike për policët është që:”Gjatë procesit që do të zhvillohet kundër tyre, të mos e marrin përgjegjësinë për vendimet që i kanë marrë të tjerët, sepse në fund të krejt kësaj drame që do të zhvillohet mbi kurrizin e tyre, përpos që do të përballen me rrezikun e dënimeve eventuale, të cilët nëse dënohen, përveç se nuk do të mund të punojnë kurrë më në shërbimin publik, me arsyetimin se kanë keqpërdorur pozitën zyrtare, do të përballen me fjalinë e famshme Askush nuk është mbi Ligjin”.
Ai ka theksuar se fjalinë (Askush nuk është mbi ligjin) do ta dëgjojnë më së shpeshti pikërisht nga ata të cilët, duke e vënë veten mbi ligjin, qoftë zyrtarisht qoftë jozyrtarisht, kanë urdhëruar deportimin.
Në fund të shkrimit të bërë në Facebook, Sherifi ka pohuar se secili duhet ta merr përgjegjësinë në mënyrën që iu takon, dhe që së paku ata që urdhëruan deportimin e shtetasve turq të mos mund t’iu thonë policëve asnjëherë se na vjen keq mirëpo nuk mund të ju ndihmojmë sepse “Askush nuk është mbi ligjin”./Telegrafi/
