Shefi i Shtabit të Përgjithshëm të Ushtrisë së Izraelit ka dhënë dorëheqje.
Shefi i Shtabit të Përgjithshëm të Ushtrisë së Izraelit, Herzi Halevi, ka njoftuar dorëheqjen nga detyra, duke marrë përgjegjësinë për sulmin vdekjeprurës të Hamasit më 7 tetor 2023. Ky sulm shkaktoi tronditje të thellë në Izrael dhe zbuloi dobësi të konsiderueshme në sistemin e sigurisë.
Në një deklaratë të martën, Halevi bëri të ditur se dorëheqja do të hyjë në fuqi më 6 mars. Ai mori detyrën si Shef i Shtabit në janar 2023, por pas ngjarjeve tragjike të tetorit, ndjeu se duhej të mbante përgjegjësinë.
Sulmi më 7 tetor, i udhëhequr nga grupi palestinez Hamasi, rezultoi me vrasjen e 1200 personave, shumica prej tyre civilë, dhe rrëmbimin e 250 të tjerëve. Aktualisht, më shumë se 90 pengje mbahen ende në Rripin e Gazës, ndërsa mendohet se një e treta e tyre mund të kenë humbur jetën.
Në letrën e dorëheqjes, Halevi tha se “ushtria, nën udhëheqjen time, dështoi në detyrën e saj për ta mbrojtur shtetin e Izraelit”.
Ndërkohë, ushtria izraelite ka intensifikuar operacionet e saj ushtarake. Të martën, një operacion në Bregun e okupuar Perëndimor shkaktoi vdekjen e gjashtë personave dhe plagosjen e 35 të tjerëve, sipas Ministrisë palestineze së Shëndetësisë.
Lufta në Gazë, e cila pasoi sulmin e Hamasit, ka sjellë pasoja shkatërruese. Deri më tani, ofensiva izraelite ka shkaktuar mbi 46 mijë viktima palestineze dhe dëme të mëdha materiale në këtë rajon të bllokuar.
Dorëheqja e Gjenerallejtënant Halevit e bën atë zyrtarin më të lartë izraelit që heq dorë nga posti për shkak të dështimeve të sigurisë. Kjo ngjarje pritet të hapë diskutime të thella mbi përgjegjësitë dhe reformat e mundshme në sistemin e mbrojtjes së Izraelit. /Telegrafi/