Sekretari amerikan i Mbrojtjes, Lloyd Austin tha të mërkurën se është e rëndësishme që Turqia të vendosë të lejojë Suedinë në NATO “më shpejt sesa vonë”, duke thënë se ai “ndihet i sigurt” se kjo do të ndodhë përpara samitit të aleancës në Lituani në korrik.
Dhe të njëjtin optimizëm ka shprehur edhe ministri suedez i Mbrojtjes, Pål Jonson, i cili tha se shpreson që vendi i tij të lejohet në aleancë deri në verë, përcjell Telegrafi.
“Ne mezi presim të vazhdojmë të avokojmë për pranimin tuaj të shpejtë në NATO dhe do të punojmë shumë për ta bërë këtë përpara samitit”, ka thënë Austin të mërkurën.
Sekretari amerikan i Mbrojtjes shtoi se anëtarësimi i Suedisë në NATO do ta bëjë aleancën më të fortë dhe kontinentin më të sigurt në një kohë vendimtare për sigurinë evropiane.
Austin dhe Jonson po flisnin me gazetarët pranë porteve në bazën detare Musko, ku zyrtari amerikan vëzhgoi marinsat suedezë në anije të vogla luftarake që kryenin një stërvitje zbarkimi.
Ai ishte vizita e parë e një shefi të mbrojtjes amerikane që nga viti 2000, kur sekretari i atëhershëm William Cohen vizitoi këtë vend.
Përpjekja e Suedisë për t’u bashkuar me NATO-n ka ngecur për shkak të kundërshtimit të Turqisë dhe Hungarisë, ndërsa Finlanda – e cila kërkoi të bashkohej me aleancën në të njëjtën kohë me vendin fqinj skandinav në maj të vitit të kaluar – u bë zyrtarisht anëtari më i ri i NATO-s më 5 prill, vetëm ditë pasi Turqia dhe Hungaria ratifikuan kërkesën e Helsinkit.
Një votim unanim i të 31 anëtarëve të NATO-s kërkohet për të pranuar anëtarë të rinj, një rregull që tani po e pengon Suedinë të bashkohet me aleancën.
Turqia e akuzon vendin se është shumë i butë ndaj grupeve që ajo i konsideron si organizata terroriste.
Presidenti i vendit Rexhep Tajip Erdogan ka thënë se Ankaraja ka nevojë për garanci të mëtejshme përpara se të japë miratimin përfundimtar për Suedinë. /Telegrafi/