SHBA dhe Shqipëria me rezolutë për dënimin e referendumeve në rajonet e aneksuara nga Rusia

Shtetet e Bashkuara dhe Shqipëria kanë filluar përgatitjen e një projekt-rezolute të Këshillit të Sigurimit të OKB-së për dënimin e referendumeve për pranimin në Rusi të rajoneve të aneksuara të Donetsk, Lugansk, Zaporizhzhia dhe Kherson, tha Përfaqësuesi i Përhershëm i Shqipërisë në Kombet e Bashkuara, Ferit Hoxha.

“Le ta bëjmë të qartë. Referendumet e rreme në Luhansk, Donetsk, Zaporizhzhia dhe Kherson nuk kanë të bëjnë fare me demokracinë, me vullnetin e lirë të ukrainasve, me asnjë standard ndërkombëtar zgjedhor”, tha Hoxha gjatë fjalës së tij në takimin e Këshillit të Sigurimit të martën.

Guvernatori i rajonit të Donetskut në lindje të Ukrainës, thotë se gjasat që Rusia të fillojë sulmet bërthamore, mund të rriten nëse Vladimir Putin në mënyrë të rrejshme i shpallë katër rajonet ukrainase si territore të Rusisë, shkruan Sky News.

Pritet që rezultatet, që ndërkombëtarisht nuk do të njihen, të zbulojnë fitoren e avokatëve të aneksimit të territoreve të Ukrainës në Rusi. /Telegrafi/